ភ្នំពេញ៖ អយ្យការសាលាដំបូងរាជធានីភ្នំពេញ បានបញ្ជាក់ពីការចាប់ខ្លួនជាថ្មីលើ អ្នកស្រី ឈឹម ស៊ីថរ ដោយថាការចាប់ខ្លួនទៅឃុំសារជាថ្មីនេះគឺដោយសារជនត្រូវចោទបានបំពានកាតាព្វកិច្ច នៃការត្រួតពិនិត្យតាមផ្លូវតុលាការ។
ក្នុងសេចក្ដីថ្លែងការណ៍ចុះថ្ងៃទី២៩ ខែវិច្ឆិកា ឆ្នាំ២០២២ អយ្យការអមសាលាដំបូងរាជធានីភ្នំពេញបានបញ្ជាក់ថាការចាកចេញរបស់ ឈម ស៊ីថរ ពីព្រះរាជាណាចក្រកម្ពុជាដោយគ្មានការអនុញ្ញាត គឺបានបំពានលើកាតាព្វកិច្ចនៃការត្រួតពិនិត្យតាមផ្លូវតុលាការ ដោយបានលើកយកមាត្រា ២៣០នៃក្រមនីតិវិធីព្រហ្មទណ្ឌមកបញ្ជាក់ថា «ប្រសិនបើជនត្រូវចោទបានគេចវេះដោយចេតនាពីកាតព្វកិច្ចត្រួតពិនិត្យតាមផ្លូវតុលាការ ចៅក្រមស៊ើបសួរអាចសម្រេចឱ្យឃុំខ្លួនជនត្រូវចោទបណ្ដោះអាសន្នបាន»។
អយ្យការអមសាលាដំបូងរាជធានីភ្នំពេញបានបញ្ជាក់ថា ការដោះលែង ឈឹម ស៊ីថូរ ឱ្យនៅក្រៅឃុំកាលពីខែមីនា ដោយបានប្រើប្រាស់វិធានការជំនួសមកវិញនូវដីការសម្រេចដាក់ជនត្រូវចោទឱ្យស្ថិតនៅក្រោមកាតាព្វកិច្ចនៃការត្រួតពិនិត្យតាមផ្លូវតុលាការ ដែលដីការសម្រេចនេះជនត្រូវចោទត្រូវតែគោរពតាម និងអនុវត្តឱ្យបានម៉ឺម៉ាត់។
អយ្យការបានបន្ថែមថា៖ «ចំពោះការលើកឡើងថា ជនត្រូវចោទមិនបានទទួលដំណឹងពីដីកាសម្រេចដាក់ជនត្រូវចោទឱ្យស្ថិតនៅក្រោមកាតាព្វកិច្ចនៃការត្រួតពីនិត្យតាមផ្លូវតុលាការនោះ កាន់តែបង្ហាញយ៉ាងច្បាស់ក្នុងចេតនាមិនទទួលខុសត្រូវចំពោះមុខច្បាប់»។
គួរឲ្យដឹងដែរថាឈ្មោះ ឈឹម ស៊ីថរ គឺជាអតីតបុគ្គលិកណាហ្គាវើល និងជាមេសហជីពមួយផងដែរ ដែលបានដឹកនាំបាតុកម្មខុសច្បាប់នៅមុខក្រុមហ៊ុនណាហ្គាវើលដ៍ត្រូវបានសមត្ថកិច្ចចាប់ខ្លួនកាលពីរសៀលថ្ងៃទី៤ ខែមករា ឆ្នាំ២០២២ ខណៈដែលកំពុងតែដឹកនាំបាតុកម្មខុសច្បាប់នៅមុខស្ថាទូតអូស្ត្រាលី នឹងត្រូវចោទប្រកាន់ពីបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ប្រព្រឹត្តនៅប្រទេសកម្ពុជា។ ទោះជាយ៉ាងណា ឈឹម ស៉ីថរ តែត្រូវបានតុលាការអនុញ្ញាតឲ្យនៅក្រៅឃុំវិញនៅថ្ងៃទី១៤ ខែមីនា ឆ្នាំ២០២២ និងត្រូវដាក់ពិនិត្យតាមផ្លូវតុលាការដោយមិនឲ្យចេញទៅក្រៅប្រទេសនោះទេ៕